„СЏФ Рекордс“ ќе го промовира деби изданието на Пијан Славеј
Во пресрет на 21. Оф-фест (1-4 јуни), Скопскиот џез фестивал ќе го промовира новото издание на „SJF Records“ – првата дискографска објава на Пијан Славеј. Промоцијата ќе се одржи на 18 мај, во 20 часот, во „Макка бар“ во Скопје.
Во снимањето на изданието учествуваа Бранислав Николов – глас, мини електрично пијано; Пеце Трајковски-Брада – дигитален акордеон, ел. гитара, синт, програминг; Андреа Мирческа – контрабас; Мартин Џорлев – клавијатури; Мартина Баракоска – тапани.
Деби-изданието на Пијан Славеј се состои од пет композиции, со вкупно времетраење од 18 минути. Автор на текстовите и музичката скица е Пијан Славеј (Бранислав Николов), а аранжманите и музиката во поширок контекст се дело на групата.
На изданието гостуваат Сара Мејс (харфа), Петар Христов (кларинет) и Никола Ристановски (глас). Песните се снимени, миксани и продуцирани од Ивица Јанкуловски во скопското студио „Алшар“. Дизајнот на омотот е на Александар Поповски – Цанче. Извршен продуцент на изданието е Оливер Белопета.
– Изворната идеја на овој акт беше да се свири поконкретна музика со поетски сензибилитет на една нова македонска шансона. А потоа, тоа стана импулс за послободна и поширока групна интерпретација, градба и наслојување. Сега сѐ повеќе доаѓа до израз развивањето на инструменталното ткиво врз зборовната коскеност.
Од нежен ламент до крик – чувството на изолираност и загуба како нов духовен пејзаж, но и потребата од вистинскиот уметничи допир и преживување, се суштинскиот драјв на оваа музичка експресија што постојано се трансформира во потрага по сопствен природен глас, истакнуваат од „СЏФ Рекордс“.
Покрај физичкото компакт-диск издание, Пијан Славеј ЕП ќе биде достапно и на сите популарни глобални дигитални платформи и стриминг сервиси.