Преку три механизми, Владата предводена од СДСМ обезбедува вакцини против Ковид 19 за 60 отсто од населението, а ВМРО-ДПМНЕ обезбедува само деструкција и лажни вести, реагира СДСМ на обвинувањата на опозициската ВМРО-ДПМНЕ што денеска ги изнесе портпаролот Наум Стоилковски.

„Повеќе од три години трае деструктивното, неодговорно однесување на Христијан Мицкоски кое е на штета на граѓаните и опасно по јавното здравје. Мицкоски и ВМРО-ДПМНЕ немаат поим од ништо освен да шират лажни вести, да работат против интересите на граѓаните, на државата. Безмалку една година ВМРО-ДПМНЕ предводена од губитникот Мицкоски го поткопува здравствениот систем, го погазува трудот на здравствените работници, а во последните недели шири лаги и невистини со кои се обидува да внесе вознемиреност во јавноста. Фрустрациите на ВМРО-ДПМНЕ се толку големи што заради гол популизам го ставаат на коцка здравјето на граѓаните во оваа коронакриза. Граѓаните да бидат спокојни, да не подлегнуваат на лажните тези на ВМРО-ДПМНЕ. Владата предводена од СДСМ, преку три механизми, ќе обезбеди вакцини против корона вирусот за вакцинирање на 60 проценти од населението. ВМРО-ДПМНЕ, како и досега ќе обезбеди само шарени лаги и деструкции“, соопшти СДСМ.

Стоилковски денеска обвини дека во целиот регион почнала вакцинацијата на населението против коронавирусот, а само Македонија извисила и сѐ уште нема вакцини и за тоа ги обвини премиерот Зоран Заев и министерот за здравство Венко Филипче.