Владејачката партија СДСМ соопшти дека лидерот на ВМРО-ДПМНЕ, Христијан Мицкоски со денови ја лажел јавноста дека има 61 глас за ново мнозинство во Собранието и гласање недоверба на Владата.

„Вчера тој меур од лаги се распрсна уште на почетокот на седницата во Собранието. Очаен од поразот, Мицкоски вчера ширеше невистини за наводно киднапрање на пратеник, а истиот пратеник јавно објави дека бил под закани токму од опозицијата“ велат во соопштението на СДСМ.

Од СДСМ тврдат дека Мицкоски поради „пустата желба за власт седнал на иста маса со анти НАТО и анти ЕУ структури“. Тие го обвинуваат лидерот на опозицијата дека е вината е само негова и тој не треба да ја префрла на други.

„Народот повторно е излажан од Христијан Мицкоски и затоа наместо да шири невистини, Мицкоски треба да се засрами, да излезе и да им се извини на граѓаните, а потоа и да си даде оставка“ велат од СДСМ.

ВМРО-ДПМНЕ тврди дека требало да се киднапира пратеник за опстојување на владата

„Требаше да киднапираат пратеник само за да опстои владата, Заев е најлошото за Македонија. Власта не покажа дека има мнозинство, владата на Заев е единствена која немаше пратеници да ја бранат.“ се вели во соопштението на опозицијата.

Од опозициската ВМРО-ДПМНЕ тврдат дека Заев вчера „ја убил демократијата во државата и дека нивната влада е делегитимирана“.

Тие тврдат дека „губитникот Заев“ има само 59 пратеника плус еден киднапиран пратеник.

„Со недемократски методи на владеење ќе тонеме на листите на релевантните меѓународни институции“ велат од партијата.