Саудиските власти ги ослободија принцезата и нејзината ќерка, кои беа затворени без обвинение речиси три години, соопшти во саботата група за човекови права, јави Би-Би-Си.

Басма бинт Сауд (57), членка на кралското семејство која долго време се сметаше за застапник за правата на жените и уставната монархија, е во притвор од март 2019 година, а во април 2020 година ги молеше кралот Салман и престолонаследникот Мухамед бин Салман да ја ослободат од здравствени причини.

Принцезата „и нејзината ќерка Сухуд Су се ослободени“, објави ALQST на Твитер.

„Нејзе и беше одбиена медицинската нега што и требаше поради нејзината животозагрозувачка состојба“, додаде групата за човекови права. „Против неа во ниту еден момент не е покренато обвинение за време на нејзиниот притвор.

Принцезата Басма беше уапсена непосредно пред планираното патување во Швајцарија на лекување, откри извор близок до семејството.

Природата на нејзината болест никогаш не е откриена.

Принцезата Басма беше задржана во затворот Ал-Хаир, каде што има многу други политички затвореници.

Во писменото сведочење до Обединетите нации во 2020 година, пренесено од АФП, нејзиното семејство рече дека нејзиното притворање веројатно во голема мера е резултат на нејзината улога како „отворен критичар на злоупотребата“.

Таа се сметаше и за сојузник на Мухамед бин Најџеф, се додава во писменото сведоштво.