Саудиска Арабија денеска соопшти дека ќе понуди план за јеменските бунтовници Хути за прекин на огнот во повеќегодишната војна во земјата со кој ќе се дозволи и повторно отворање на големиот аеродром во главниот град. Тоа е последниот обид на Кралството да ги запре борбите што предизвикаа најголема хуманитарна криза во најсиромашната нација во арапскиот свет.

Потегот на Саудиска Арабија следува откако јеменските бунтовници Хути ја зајакнаа кампањата со напади со беспилотни летала и ракети што се насочени кон нафтените локации на Кралството. Исто така, тоа се случува во момент кога Ријад се обидува да го рехабилитира својот имиџ со САД под претседателство на Џо Бајден.

Еднострано прогласениот саудиски прекин на огнот пропадна минатата година. Борбите беснеат околу клучниот град Мариб и коалицијата предводена од Саудиска Арабија почнаа воздушни напади уште вчера, насочени кон главниот град на Јемен, Сана.

Мисија на ОН соопшти дека во друг воздушен напад е погодена компанија за производство на храна во пристаништниот град Ходеида.

– Сега зависи се од Хутите, кои мора да одлучат дали да ги стават своите интереси на прво место или интересите на Иран на прво место, изјави саудискиот министер за надворешни работи, принцот Фајсал бин Фархан на прес-конференција во Ријад.

Саудиска Арабија соопшти дека планот ќе биде презентиран и пред Хутите и пред меѓународно признатата влада на Јемен во текот на денот. И двете ќе треба да го прифатат за тој да се реализира.