Сашкa и Сашкo стојат зад креативниот инстаграм-профил за храна @sash_dream. Сашка работи како координатор за набавки во странска компанија, а Сашко го менаџира сопствениот ресторан специјализиран за кетеринг и организација на настани од секаков тип.

Ќе сакате да ги направите повторно: Сашка и Сашко со рецепт за неодоливи браунис

Нивна заедничка пасија е гастрономијата, па како што ни открива Сашка, со готвењето се релаксира по напорните денови на работа, а Сашко, пак, ја развива својата креативност преку естетското послужување на приготвената храна. Оваа супер идеја е производ на пандемијата, а инспирација црпат од секојдневието и од блоговите за храна.

„Многу често се случувало да патуваме заедно, да вкусиме нешто карактеристично за дестинацијата, а ново за нас и веднаш кога ќе се вратиме да пробаме да направиме наша варијанта“, ни откриваат тие.

Денеска Сашка и Сашко ни откриваат рецепт за здрав нутритивен ручек или вечера – пилешко со тиквички, шери доматчиња и моцарела!

Потребни состојки:

– 400 г пилешко
– 2 мали тиквички
– 1 мала главица кромид
– 10-тина шери домати
– 50 г свежа моцарела
– 1 лажица маслиново масло
– 3 лажички песто

Подготовка:

Сите состојки ги сецкате на коцки. Пилешкото се зачинува со сол, црн бибер и сушен босилек. Најпрво во добро загреана тава со маслиново масло го пропржувате кромидот, па по следниот редослед ги додавате и останатите состојки: пилешкото, тиквичката, шери доматите, па пестото. Секоја наредна состојка ја додавате после 5 минути, промешувајќи повремено. Откако ќе го додадете пестото ја исклучувате ринглата, ја додавате моцарелата (претходно насецкана на коцкички) и вашиот ручек или вечера е готова!

Овој рецепт е за две лица, а во продолжение ги имате нутритивните вредности по порција:

– 442 калории
– 13.4 г јаглехидрати
– 23.4 г масти
– 45.3 г протеин