Сашка и Сашко ни приготвија интересен рецепт: Чоколадна варијанта на познатиот Њујорк чизкејк
Сашка и Сашко стојат зад креативниот инстаграм-профил за храна sash_dream. Сашка работи како координатор за набавки во странска компанија, а Сашко го менаџира сопствениот ресторан специјализиран за кетеринг и организација на настани од секаков тип.
Нивна заедничка пасија е гастрономијата, па како што ни открива Сашка, со готвењето се релаксира по напорните денови на работа, а Сашко пак, ја развива својата креативност преку естетското послужување на приготвената храна. Оваа суперидеја е производ на пандемијата, а инспирација црпат од секојдневието и од блоговите за храна.
„Многу често се случувало да патуваме заедно, да вкусиме нешто карактеристично за дестинацијата, а ново за нас и веднаш кога ќе се вратиме да пробаме да направиме наша варијанта“, ни откриваат тие.
Денеска ни откриваат рецепт за чоколадна варијанта на класичниот Њујорк чизкејк.
Состојки:
Кора:
- 24 орео колачиња (мелени)
- 80 гр путер (растопен)
Фил:
- 500 гр крем сирење
- 500 гр маскарпоне
- 60 мл млеко
- 3 јајца + 2 жолчки
- 300 гр шеќер
- 2 лажици какао во прав
- 250 гр темно чоколадо (растопено)
- 2 лажици ванила
Ганаш:
- 250 гр темно чоколадо
- 120 мл слатка павлака
View this post on Instagram
Подготовка:
Калапот за печење со големина од 24 см обложете го со алуминиумска фолија, а внатрешноста премачкајте ја со путер. Соединете ги орео колачите и путерот и натапкајте ги во садот така што ќе формирате кора. Крем сирењето и маскарпонето кои стоеле на собна температура изматете ги убаво во длабок сад, па постепено додавајте ги: млекото, јајцата, жолчките и шеќерот и убаво измиксајте. Додадете ги какаото и ванилата и миксајте уште 30-тина секунди, додека не се соедини. Со гумена шпатула додадете го растопеното чоколадо кое сте го оставиле 10-тина минути да се излади. Истурете ја смесата врз „орео“ кората. Во поголемо тавче ставете го калапот и залијте го со зовриена вода до половина. Се пече 1 час и 20 минути во загреана рерна на 160 степени (при што не смее да се отвора рерната, a после тоа исклучете ја рерната и оставете го уште 45 минути. Финално извадете го на собна температура и оставете да се излади барем 40 минути пред да го ставите во фрижидер (цела ноќ или барем 4 часа). Потоа, отстранете го обрачот од калапот, полејте го со ганаш, кој се подготвува многу едноставно: зовријте ја слатката павлака и истурете ја врз чоколадото, па размешајте додека да се соедини. Почекајте ганашот да се стегне
пред послужување.
На здравје!