Мерката за бесцарински увоз на замрзнато месо за преработки истече на 5 јуни, а сопствениците на фабриките од месната индустрија бараат нејзино итно продолжување. Тие велат дека без таа мерка нивното производство значително ќе поскапи, а ќе бидат принудени и да отпуштаат работници.

– Ако нема бесцарински увоз на замрзнато месо, во најкус период односно за 2 до 3 недели во зависност од тековните резерви, ќе мора да ги зголемиме цените за износот на царината, а тоа значи за 20 до 30 проценти. На подолг рок ќе следува и престанок со работа на некои од месопреработувачките капацитети – изјави Гоце Трајчев, претседател на Групацијата на производители и преработувачи на месо.

Министерот за економија Крешник Бектеши одговарајќи на новинарско прашање, рече дека владата ќе го разгледа нивното барање и ќе се изјасни дали е оправдано продолжување на мерката.