После доброто издание против Финска (1:3), денеска во арената „Стожице“ во Љубљана (Словенија) сликата на паркетот беше поразлична, Турците доминираа и триумфираа со 0:3.

„Црвено-жолтите“ се свесни дека имаа шанси за многу подобри резултати, но кога беше најпотребно концентрацијата не беше на највисоко ниво.

– Во првите два сета бевме блиску до противникот. Мислам дека главната причина за нашиот пораз беше нашето недоволно искуство и трпение. Како и да е, ова е нашето прво Европско првенство. Имавме две шанси, сега за тоа што следува останува да уживаме на турнирот и се надевам дека ќе покажеме подобри перформанси на наредните средби – вели македонскиот одбојкар Александар Љафтов.

Љафтов беше нашиот најефикасен играч против турската селекција со 10 поени.

– Беше еден тежок натпревар. Во клучните моменти нашата концентрација не беше на највисоко ниво и тоа се покажа како клучно за конечниот резултат – се зборовите на нашиот репрезентативец Владо Милев.

В сабота исто така од 17.30 часот ќе го играме и третиот дуел на ЕП против бранителот на титулата, Русија.