САД со ревидирана листа на осомничени за кршење на човекови права: Нема виза за нови кинески функционери и членови на нивните семејства
Соединетите Американски Држави денеска објавија нова листа со кинески функционери кои се осомничени за кршење на човековите права и за нив ќе нема издавање на визи за влез во земјата.
– Новите рестрикции се однесуваат на сите официјални лица на Комунистичката партија на Кина кои се вклучени во такви репресивни активности, без оглед каде и да се наоѓаат, се наведува во соопштението на американскиот државен секретар Мајк Помпео.
Исто така и членовите на семејствата на кинеските претставници, кои се предмет на санкции, нема да добијат визи за влез во САД. Вашингтон во изминатите месеци ги интензивира рестрикциите за визи за кинеските функционери и студенти.
Стејт департментот ги укина визите за повеќе од 1.000 кинески студенти и истражувачи кои се осомничени за шпионажа и им забрани влез во САД на кинеските владини претставници кои се вмешани во кршење на човековите права на муслиманите Ујгури и репресијата во Хонг Конг.
Стејт департментот, исто така, драстично го ограничи влезот за членовите на Комунистичката партија на Кина.