САД ја одобрија вакцината на Џонсон и Џонсон која се дава во една доза: Што се предностите и како таа функционира?
Американската Управа за храна и лекови (ФДА) во саботата ја одобри вакцината против коронавирус на компанијата Џонсон и Џонсон, пишува Си-Ен-Ен.
Тоа е првата вакцина против ковид-19 која се дава во една доза и која е достапна во САД.
Со повеќе од 28,4 милиони потврдени случаи на ковид-19 во САД и речиси 511.000 пријавени смртни случаи од почетокот на пандемијата, овие вакцини се многу потребни и тоа во што пократок рок.
Вакцината на компанијата Џонсон и Џонсон е безбедна и ефикасна. Се дава во една доза и не бара посебно складирање, како што е случајот со Фајзер. Вакцината е дозволена за лица постари од 18 години.
Анализите покажаа дека вакцината „Џонсон и Џонсон” е 66 проценти ефикасна во спречување на средна до тешка форма на ковид-19 и сто проценти ефикасна против најтешките форми на болеста за кои е потребна хоспитализација и може да доведе до смртен исход.
Американскиот претседател Џо Бајден изрази задоволство и го поздрави одобрението издадено од ФДА за вакцината на Џонсон и Џонсон против ковид-19.
– Гледаме светло на крајот од тунелот, но не смееме да го спуштаме гардот или да претпоставиме дека победата над вирусот е сигурна, порача Бајден.
Што се предностите и како таа функционира?
Фактот дека вакцината се дава само во една доза, секако го олеснува и забрзува процесот на вакцинација.
„СЗО смета дека вакцината која се дава во една доза е најдобро решение во условите на пандемија“, тврдеше кон крајот на јануари докторот Пол Стофелс, шеф на научниот тим на белгиска фармацевтска компанија.
Тој тогаш рекол дека и дека оваа вакцина „би можела да заштити стотици милиони луѓе од најтешките последици на ковид-19“.
Оваа вакцина користи вирус на обична настинка кој е модифициран да биде безопасен. Тој во себе безбедно носи дел од генетскиот код на вирусот и се внесува во организмот. Тоа е доволно за телото да ја препознае заканата и потоа да научи како да се бори против ковид-19.
Вакцината го тренира организмот да знае како да се однесува кога ќе се сретне со вистинскиот вирус. На сличен начин функционира и вакцината која ја разви компанијата АстраЗенека.