Дипломати од Индија и САД денеска се обврзаа дека ќе го прошират мултилатералното безбедносно партнерство и ќе ги продлабочат односите меѓу двете земји во услови на загриженост поради зголеменото влијание на Кина во регионот.

Американскиот државен секретар Ентони Блинкен и индискиот министер за надворешни работи Субраманијам Џаишанкар се состанаа во Њу Делхи, во обид да го зајакнат регионалниот фронт во борбата против зголеменото влијание на Пекинг во индо-пацифичкиот регион и да ја интензивираат соработката во Авганистан.

Тие ја пофалија меѓусебната помош во борбата против коронавирусот и изјавија дека нивното партнерство во областа на вакцините е обид да се стави крај на пандемијата.

– Постојат малку односи во светот кои се поважни од односите меѓу САД и Индија. Ние сме двете водечки демократии во светот и нашата разновидност ја поттикнува нашата национална сила, рече Блинкен на заедничката прес-конференција.