Маја Коцијанчиќ, портпаролката на ЕУ, во изјава за изборите кои се одржаа на 30 јуни во Албанија, рече дека тие биле генерално мирни и редовни.

Таа повикува штотуку избраните локални институции да работат според нивните уставни надлежности, апел кој, како што пренесува Балканвеб, личи на признавање на 30 јуни, и покрај фактот што во 31 општина имаше само еден кандидат.

– Локалните избори што се одржаа во Албанија во неделата на 30 јуни се одржаа во контекст на политичка поделба, но на генерално мирен и уреден начин. Ги земавме предвид сите претходни забелешки направени од страна на шефот на Мисијата за набљудување на изборите на ОБСЕ/ОДИХР.  Новоизбраните локални органи сега треба да бидат способни да работат според нивните уставни овластувања, во корист на граѓаните на земјата – рече меѓу другото Коцијанчиќ.

И Амбасадатата на САД во Тирана реагираше за првпат по локалните избори на 30-ти јуни.

„САД ги поздравуваат заклучоците на набљудувачката мисија на ОДИХР, според кои локалните избори на 30 јуни генерално беа спроведени на мирен и уреден начин и дадоа општа позитивна оценка за бројување на гласовите. Сепак, ние признаваме, така како што истакна и ОДИХР, дека политичкиот грч и поларизацијата придонесоа за избори во кои гласачите немаа целосен избор. И покрај препреките, албанскиот народ – било тие кои учествуваа на изборите или тие кои беа воздржани – мирно го искористија нивното демократско право и ние им честитаме за тоа“, стои  во соопштението на амбасадата на САД.