САД го поздравија договорот меѓу Косово и Србија и ѝ се заблагодарија на македонската Влада за поддршката
САД го поздравија договорот што го постигнаа Косово и Србија во Охрид со посредство на ЕУ за спроведување на Договорот за патот кон нормализација на односите, соопшти американскиот Стејт департмент.
„Ги пофалуваме претседателот на Србија и премиерот на Косово за нивното лидерство во постигнувањето на овој договор. Исполнувањето на обврските на Косово и Србија од Основниот договор, во рамките на трајната определба за помирување, ќе обезбеди значителни можности за граѓаните на двете земји и да го забрзаат нивниот пат кон членство во Европската унија“, се вели во писмената изјава на американскиот државен секретар Ентони Блинкен.
Во неа се додава дека САД ќе продолжат да бидат активно ангажирани, во соработка со партнерите од ЕУ „да ги поддржат Косово и Србија во нивната работа на имплементација со цел да се постигнат предвидливи и мирни односи“.
„Ќе продолжиме да го поддржуваме подобрувањето на стабилноста и просперитетот на Западен Балкан“, се додава во соопштението.
САД ѝ се заблагодаруваат на Европската Унија за посредувањето во преговорите и на Владата на Северна Македонија што била домаќин и поддржала финализирање на договорот.
Блинкен на својот Твитер профил исто така изјави дека го поздравува договорот. Тој додаде дека САД остануваат „посветени на унапредување на европската и евроатлантската интеграција“.