САД санкционираа уште седум лица вкучени во организацијата на изборите на Крим, според соопштението кое во средата го објави американското министерство за финансии.

ЕУ во вторникот воведе санкции против тие лица, а на истите им се придружи и Канада, додаде министерството за финансии.

– Чекорот на министерството за финансии во координација со нашите меѓународни сојузници и партнери ја нагласува нашата непоколеблива поддршка за враќање на слободните и праведни демократски процеси во Крим – напиша американскиот министер за финансии Стивен Мнучин.

Додаде дека „овие кооридинирани санкции на САД, ЕУ и Канада ја нагласуваат силата на трансатлантскиот сојуз во спротиставување на руската агресија која продолжува“.

Новите санкции се однесуваат на луѓето кои на 8 септември 2019 година ги организираа изборите во автономната република Крим и Севастопол, украински територии над кои во 2014 година Москва презема контрола.

На мета на санкциите особено е премиерот на териториите Јуриј Готсанјук, гувернерот на Севастопол и неколку службеници на изборната комисија на тој град.

Вашингтон исто така ја санкционираше и железничката компанија која делува на Крим и нејзиниот генерален директор.