Генералниот секретар на НАТО Марк Руте денеска изјави дека сите потенцијални решенија за решавање на кризата во Украина мора да ја вклучат и оваа земја. Руте во исто време го нарече рускиот претседател Владимир Путин „силен преговарач“ и додаде дека неговото учество во преговорите е неопходно за постигнување мир, пренесе „Ројтерс“.

„Имав многу средби со него од 2010-2014 година во моето претходно својство. Тој е силен преговарач и е непредвидлив. Но, ако сакаме решение за мир, тој мора да биде дел од преговорите“, рече Руте.

Изјавите на Руте доаѓаат откако американскиот претседател Доналд Трамп вчера објави дека се договорил со рускиот лидер Владимир Путин итно да започнат преговорите за ставање крај на војната.

Членството на Украина во НАТО никогаш не било услов за постигнување мир, потсети Руте, коментирајќи ги ставовите на Вашингтон дека членството на земјата во Алијансата е „непрактично“ и „нереално“.

„Никогаш немало таков договор… На Украина никогаш не ѝ било ветено дека ќе стане дел од НАТО како дел од мировниот договор“, рече Руте по состанокот на министрите за одбрана на НАТО во Брисел.

Тој прецизираше дека секогаш се зборувало за „неопходноста од безбедносни гаранции за Украина“.

Министрите за одбрана на НАТО ја забележаа и разговараа за иницијативата на американскиот претседател Доналд Трамп за решавање на конфликтот во Украина, изјави генералниот секретар на НАТО.

Тој додаде дека „министрите одржале дискусија за најновите случувања“ со учество на украинскиот министер за одбрана и шефот на европската дипломатија.