Русковска: Боки 13 не беше уапсен во библиотека, туку при бегство
Адвокатот Сашо Дуковски денеска од судскиот совет кој го води предметот „Рекет“ побара да му биде укинат притворот на обвинетиот Бојан Јовановски.
– Бараме да му биде укинат притворот бидејќи веќе нема потреба од негово продолжување под околноста „опасност од бегство“, побара адвокатот Дуковски.
Обвинителката Вилма Русковска рече дека се противи на било какво пуштање од притвор на Бојан Јовановски бидејќи него полицијата не го нашла во библиотека, туку го уапсила на граница при обид за бегство, нагласи Русковска.
Обвинетиот Бојан Јовановски пак во својата одбрана по предлогот рече дека е ноторна лага кажаното од обвинителката дека тој бил уапсен при обид за бегство.
– Нити сум имал намера да бегам или да се кријам од законот. Кога ми беше одреден притворот обвинителката и тогаш кажа ноторна лага дека екипа на МВР ме следеле и дека со 200 километри на час со возило сум им избегал. Лица со поголема криминална историја се на слобода, а врз мене се тренира правда. Мојата здравствена состојба стана „Шпанска серија“. Седум месеци сум во притвор. Давам ветување дека нема да го променам местото на живеење и поради економичност на постапката – рече Јовановски.
По однос на барањето на одбраната, судот рече дека на следното рочиште ќе се произнесе по барањето.