Руските власти означија повеќе новинари како странски агенти

Русија руско знаме Министерство за надворешни работи МНР
Руско министерство за надворешни работи / Фото: EPA-EFE/MARTIN DIVISEK

Министерството за правда на Русија денеска додаде неколку новинари, меѓу кои се и пет новинари од Радио Слободна Европа (РСЕ) во регистарот на „странски медиумски агенти“.

Руското законодавство усвои одредби за „странски агенти“ во 2012 година и ги измени неколку пати, барајќи од невладините организации, кои добиваат странска помош и за кои владата смета дека се занимаваат со политички активности, да бидат регистрирани и идентификувани како „странски агенти“, како и да подлежи на даночна контрола, пренесува Радио Слободна Европа.

Последователните измени на законот беа насочени кон медиуми финансирани од странство, вклучително и услуги за РСЕ на руски јазик, и неколку дописници на РСЕ беа додадени на листата.

Претседателот на РСЕ, Џејми Флај, го осуди овој потег како уште еден напад врз слободните медиуми во Русија и ја потврди посветеноста на медиумите кон руската јавност.

„Денешното таргетирање на Кремљ на пет руски државјани кои работат за РСЕ е само последниот обид да се замолчат независните медиуми на Русија. Ние ќе продолжиме да се бориме против оваа апсурдна употреба на законот за „странски агенти” за контрола на информациите до кои можат да пристапат руските граѓани“, рече Флај.

На листата беа додадени и новинарот Данил Сотников од независниот канал за вести ТВ Дожд, дописникот на Би -Би -Си на руски јазик Андреј Захаров, Галина Арапова, директорката на Центарот за заштита на правата на медиумите и активистот за заштита на животната средина, Евгениј Симонов.

Во регистарот се додадени и истражувачкиот проект „Белингкет“, МЕМО, издавач на веб – страницата „Кавкаски јазол“ и американската компанија „Мејсон ГЕС Анонимна фондација“, која е сопственик на онлајн публикацијата „М.њуз“.

Околу 85 лица и организации досега се запишани во регистарот на „странски агенти“, од кои 68 од почетокот на годината.

Во отворено писмо на 1 септември, главните уредници на повеќе од 20 независни руски изданија побараа укинување на листата на медиумски „странски агенти“, предлагајќи 12 амандмани на постојниот закон за „странски агенти“.

Отворено писмо беше испратено до рускиот претседател Владимир Путин, неговиот портпарол Дмитриј Песков и министерот за правда Константин Чуиченко, а Кремљ вети дека ќе го разгледа жалбата на новинарите.

Извор: Бета

Видео на денот