Руски брод задржан во Полска, пијаните членови на екипажот за малку ќе го насукале
Поморската канцеларија на полскиот град Гдањск денеска соопшти дека вчера бил задржан рускиот брод „Руслана“, откако тој се движел кон плажата на островот Собјешево, вон одредената навигациска рута и за малку ќе заринкал, јавуваат локалните медиуми.
Во последен момент била избегната несреќа, откако Крајбрежната стража реагирала и го одвела бродот на сигурно.
По проверката на бродот од страна на полскиот Државен инспектор на поморската канцеларија и граничарите, утврдено е дека повеќе членови на екипажот, меѓу кои и капетанот, биле пијани.
Бродот испловил од литванското пристаниште Клајпеда. Полските служби забележале дека тој наеднаш завртил кон брегот и се движел со голема брзина, напуштајќи ја утврдената рута. Членовите на екипажот не реагирале на предупредувањата од брегот.
Бродот бил запрен на само неколку стотици метри од плитката вода во која би се насукал, соопштија полските власти.