Русија тврди дека во Киев е погодена фабрика за оружје, а не станбена зона
Руското Министерство за одбрана денеска тврдеше дека се лажни обвинувањата дека во ракетен напад на украинската престолнина погодиле станбена зона.
– Лажна вест е дека руските сили погодиле цивилни мети во Киев. Ракетите прецизно ги погодија работилниците на фабриката Артиом. Штетите нанесени на соседната станбена зграда се последица од падот на украинските противвоздушни ракети, се наведува во соопштението на руското Министерство за одбрана.
Како што јави специјалниот известувач на „Слободен печат“ и „Утрински брифинг“ од Киев, Кристина Атовска, во денешниот напад биле убиени најмалку двајца цивили, а ранети се дваесетина луѓе.
Во соопштението од руското министерство се посочува и дека фабриката за производство на ракети во Киев била цел на напади и во април.
Украинските власти претходно соопштија дека едно лице загинало, а четворица се повредени и се пренесени во болница по нападите рано утрово врз станбена област во близина на центарот на Киев.
ЕКСКЛУЗИВНО ВИДЕО | Девојче и нејзината мајка тешко повредени во гранатирањето на Киев