Русија: Одлуката на САД да не се вратат на Договорот за отворено небо е политичка грешка
Русија е разочарана од одлуката на САД да не се вратат на Договорот за отворено небо, иако таквиот потег беше очекуван, изјави денеска рускиот заменик министер за надворешни работи Сергеј Рјабков.
– САД направија уште една политичка грешка, нанесувајќи му нов удар на европскиот безбедносен систем, истакна Рјабков.
САД вчера ја известија Русија дека нема повторно да се приклучат на Договорот за отворено небо, кој овозможува набљудувачки летови, користејќи невооружени авиони, над земјите-членки.
– Ние секако не сме задоволни од тоа. Разочарувачки е што САД пропуштија уште една шанса да дадат позитивен придонес во задачата за зајакнување на безбедноста во Европа, нагласил Рјабков, пренесоа руските медиуми.