Рудар преку ноќ станал милионер поради две парчиња танзанит
Рудар во Танзанија станал милионер преку ноќ откако продал две парчиња скапоцен камен, најголеми што се некогаш пронајдени во оваа земја, со вкупна тежина од 15 килограми.
Саниниу Лајзер (52) продал две парчиња танзанит за 3,4 милиони долари на Министерството за скапоцени камења во Танзанија. Лајзер рекол дека со овие пари сака да инвестира во својот крај и да изгради трговски центар и училиште во близина на неговата куќа. Тој истакнал дека многу луѓе во неговото соседство се сиромашни и не можат да си дозволат да ги одведат своите деца на училиште. Рударот рекол дека парите што ги добил нема да го променат неговиот начин на живот и дека тој планира да продолжи да се грижи за своите 2.000 крави, додека вложувањето ќе им го препушти на своите деца.
Лајзер има повеќе од 30 деца и четири сопруги.
Тој вели дека нема потреба да презема дополнителни мерки на претпазливост поради парите бидејќи неговиот крај е безбеден, а најави и голема прослава по повод ненадејната добивка.