РТС: Бајден со лидерите на ЕУ ќе разговара и за интеграциите на Македонија и Албанија

epaselect epa08954623 US President Joe Biden signs executive order on Covid-19 during his first minutes in the Oval Office, in the White House, Washington, DC, USA, 20 January 2021, following his inauguration as 46th President of the United States of America. EPA-EFE/Doug Mills / POOL

Западен Балкан ќе биде една од темите на средбата на американскиот претседател, Џо Бајден, со лидерите на ЕУ следната недела во Брисел, пренесува РТС, повикувајќи се на европски дипломатски извори.

„САД и ЕУ ќе го зајакнат својот заеднички ангажман на Западен Балкан, вклучително и дијалогот за нормализирање на односите меѓу Белград и Приштина и поддршката за клучните реформи во рамките на европската интеграција“, се наведува во нацрт-заедничката декларација што може да се промени до состанокот на претседателот, Џо Бајден со претседателот на Европскиот совет, Шарл Мишел и претседателката на Европската комисија, Урсула фон дер Лајен, на 15 јуни во Брисел.

Меѓу бројните прашања на агендата на првата посета на претседателот Бајден во Европската Унија, Западен Балкан ќе биде една од темите за која Брисел и Вашингтон ќе ја нагласат потребата од подобра соработка и координација, дознава РТС.

„САД очекуваат ЕУ да го преземе водството на Балканот, кога станува збор за дијалогот меѓу Белград и Приштина, но и целокупната политика на проширување, со активна поддршка од Вашингтон“, наведуваат дипломатските извори во Брисел и додаваат дека САД ја охрабрува ЕУ конечно да ги отвори преговорите со Северна Македонија и Албанија, имајќи предвид дека кредибилна политика на проширување на ЕУ е исто така во американски стратешки интерес.

За разлика од ЕУ, чии пет земји-членки не ја признаа независноста на Косово, претставниците на САД посочуваат дека сеопфатното решение во дијалогот меѓу Белград и Приштина треба да доведе до заемно признавање.

„Иако има некои разлики во ставовите на Брисел и Вашингтон кон регионот, администрацијата на претседателот Бајден го дели зголемениот интерес на ЕУ за прашањата на владеењето на правото и слободата на медиумите на Западен Балкан“, наведуваат во Брисел.

Главната цел на првата посета на претседателот, Џо Бајден на Европа од почетокот на неговиот мандат ќе биде „обновување на трансатлантското партнерство“ и создавање на заедничка агенда за постпандемискиот период.

Во нацрт-заедничката декларација се зборува за соработката во областите на борбата против Ковид-19, економското закрепнување и борбата против климатските промени, односите со Русија и Кина и заедничкиот став против поткопување на демократијата во светот.

Видео на денот