Рози и подароци за добредојде, топло пречекани странските туристи во Бугарија (ФОТО)
Првите странски туристи во Бугарија денеска беа пречекани со рози и бугарски сувенири на аеродромот во Бургас. Лично ги поздрави надлежната министерка. Со чартер-лет од Холандија на аеродромот во Бургас денеска пристигнаа првите странски туристи по избивањето на пандемијата на коронавирусот.
Пречекани беа од бугарската министерка за туризам Николина Ангелкова, а добија по една црвена роза и бугарски сувенири. Пречекот беше дополнет и со фолклорна програма, пренесе „Дојче Веле“.
Во Бургас денеска слетаа првите 190 странски туристи
Најсиромашната земја во Европската унија се потпира на туризмот, кој има удел од 12% во економското постигнување на Бугарија. Министерката Ангелкова, која признава дека времињата се тешки, се надева дека и покрај короната, овогодишната летна сезона ќе биде успешна. Ангелкова укажа дека на бугарскиот брег на Црното Море коронавирусот е малку раширен. Чартер-четови од Холандија би требало да има четирипати неделно.
Ќе се наполнат ли празните плажи на бугарското крајбрежје?
Многу големи хотели на бугарското крајбрежје не знаат дали и кога повторно ќе отворат, со оглед на тоа што многу чартер летови се откажани – само во јули околу 150. Исто така, тешко е да се предвиди како ќе изгледаат работите со туристите од големите пазари како Германија, Велика Британија и Русија.