Најдобриот швајцарски тенисер ја доби долгата битка со „Најк” за користење на логото „РФ”. Рожер Федерер во 2018 година ја напушти соработката со американскиот производел на спортска опрема и направи трансфер кај јапонски „Уникло” со кој беше потпишан договор на 10 години на 300 милиони долари.

Од тој момент, Федерер не беше во можност да го користи логото „РФ”, бидејќи правата врз него ги имаше „Најк”, иако се иницијали на Швајцарецот.

Повторуваше дека еден ден ќе ги врати правата на заштитниот знак:

– Логото „РФ” е на „Најк”, но еден ден повторно ќе биде мое. Тоа се мои иницијали, мои се. Се надевам дека ќе бидат кооперативни и ќе ми помогнат да го вратам. Добра работа е што не може засекогаш да бидат нивни – рече Федерер во една прилика.

Логото можеше да го носи само на патики, бидејќи користеше производ на „Најк”, а „Уникло” не го произведува тој дел од опремата.