Роналдо: Во последно време се почесто мислам на животот по фудбалот
Фудбалерот на Јувентус и на португалската репрезентација, Кристијано Роналдо, во последно време се почесто мисли на животот по фудбалот и веќе не се плаши од предизвиците кои го очекуваат. Португалецот кој наскоро ќе наполни 35 години, е свесен дека полека се приближува крајот на богатата професионална кариера и дека ќе мора да се фокусира на други нешта надвор од терените.
– Во последните пет години, се почесто размислувам за животот надвор од фудбалот. Засега уживам во овој процес но кој знае што ќе се случува една-две години. Морате да бидете подготвени и за тоа сценарио – вели Роналдо.
Португалецот кој е познат како неверојатен работник, кој максимално е посветен на тренинзите и одржувањето на формата, вели дека во последно време поголемо задоволство му претставуваат победите.
– Не сум опседнат со тренинзите. Повеќе сум опседнат и се фокусирам на успесите, победите и тоа е сосема поинаков фокус. Тренинзите се поретко ми претставуваат задоволство како што беше во минатото. Живеам за да ги забавувам фановите и луѓето кои го сакаат Кристијано. Тука не станува збор за годините, туку во прашање е менталитетот – додава Роналдо кој и со неполни 35 години е еден од најдобрите светски фудбалери.