Роналд Куман го откри најлошиот момент како тренер на Барса
Тренерот на Барселона, Роналд Куман изјави денеска дека му „мака од тоа што мора постојано да се брани“, осврнувајќи се на лошите резултати на клубот и изјави дека тој и натаму е тренер на тимот од „Камп Ноу“.
Куман на прес-конференцијата се појави насмеан и покрај шпекулациите дека ќе добие отказ, по серијата од два порази во Лигата на шампионите и слабите резултати во шампионатот.
– Уште ништо не ми кажаа од клубот. Слушнав дека претседателот на клубот беше на тренинг центарот во утринските часови, но јас не го видов – рече Куман.
Дел од шпанските медиуми објавија дека Куман ќе биде отпуштен во сабота навечер по натпреварот со Атлетико Мадрид, без оглед на резултатот. Холандскиот стратег не сакаше да одговори на прашањето за неговиот однос со претседателот на клубот, Жоан Лапорта.
🚨 𝙎𝙌𝙐𝘼𝘿 𝙇𝙄𝙎𝙏 ! 🚨 #AtletiBarça pic.twitter.com/B15SAFixvA
— FC Barcelona (@FCBarcelona) October 1, 2021
– Засега останувам. Не сум најважниот. Позитивен резултат е поважен од една личност. Сите знаат дека сум тука затоа што го сакам клубот. Се согласив да дојдам во многу комплицирана ситуација. Мака ми е што морам да се бранам постојано. Нема смисла. Денес нема, но еден ден ќе сакам да кажам сè што мислам за сето ова. Искрено, работите може да бидат подобри – додаде Куман.
Новинар го праша за најдобриот и најлошиот момент во Барселона, еве што одговори Холанѓанецот:
– Најдобриот беше кога потпишав и станав тренер на Барселона, а најлошиот заминувањето на Лионел Меси – беа зборовите на Куман.
Барселона ќе игра против Атлетико во Мадрид в сабота од 21.00 часот во шпанската „Ла Лига“, а Куман нема да биде на клупата поради суспензија од два натпревари која ја доби после црвениот картон добиен на мечот со Кадиз.