Романот „Анатомија на бумбарот“ од Стефан Марковски, веќе објавен на англиски јазик и достапен во електронска и печатена верзија на платформата „Амазон“, на македонски јазик е објавен од издавачот „Паблишер“.

Во наративот, како што во поговорот пишува Александар Прокопиев, прогресира една примамлива, куриозитетна, откачена, убаво и сочно раскажана приказна раслоена во делови што во себе носат и гнев и пркос, од една, и хумор и гротеска од друга страна, и сериозност од една, и игра од друга страна, и индивидуалност и загриженост за општочовечкото, а во спрега со судбината на својата земја, и пред сѐ, разочарување кое и во најбуквална смисла експлодира во револт, кој со себе ги носи политичарите и општествените моќници како „потрошен материјал“ со секогаш предвреме истечен рок на употреба.

Стефан Марковски (Гевгелија, 1990) е македонски романсиер, драматург и поет. Покрај „Анатомија на бумбарот“, ги објавил и романот „Еретички писма или наоѓајќи ги небата што сјаат црвено“, збирката раскази „Фауст го трча плебејскиот круг“ и поетскиот избор „Ветена земја“.

(Текстот е објавен во „Културен печат“ број 101, во печатеното издание на весникот „Слободен печат“ на 16-17 октомври 2021)