Учениците во романскиот главен град, Букурешт од утре ќе продолжат со онлајн настава, а носењето на маска ќе биде задолжително и на отворено, изјави портпаролот на префектурата, Маријана Станку-Ципишка.

Таа појасни дека е забранета работата на киносалите, на театрите и на концертните сали, како и на затворените ресторани, освен оние во хотелите и во пансионите кои имаат право да служат само свои гости. Од ваквата мерка се изземени ресторани и кафулињата на отворено. Мерките ќе важат 14 дена, а ќе почнат да се применуваат од 20 октомври во 20 часот.

Во Букурешт, во последните 24 часа, се регистрирани 581 нов случај на ковид-19, со стапка на инциденца која достигна 3,19 на илјада луѓе. Во изминатото деноноќие се потврдени 2.466 нови случаи во земјата преку 8.040-те направени тестови. Починаа 59 лица, а на одделите за интензивна нега се сместени 757 пациенти.