Тоа што се најавуваше во последно време, конечно се реализира, екипата од Рома доби нов сопственик. „Римската волчица“ од рацете на еден Американец, премина кај друг, Дан Фридкин кој доцна синоќа го потпиша договор вреден 490 милиони долари.  Фридкин исто така се обврза за дополнителни стотина милиони евра да го докапитализира клубот.

Прв човек на Рома ќе биде Рајан, синот на милијардерот од Тексас, кој ќе го има главниот збор во преодниот рок.

Со потпишувањето на договорот конечно заврши сагата околу Рома, а интересно е што во завршната фаза од преговорите помеѓу сега веќе поранешниот сопственик Џејмс Палота и Фридкин, се појави и кувајстки конзорциум кој побара повеќе време за комплетирање за зделката иако нудеа повеќе пари.

Тоа не му се допадна на Палота кој сакаше што побрзо да се заврши работата, а и Фридкин инсистираше на брзо решение за да има време да дејствува во летниот преодек рок. Прва задача на Рајан Фридкин ќе биде потпишување на нов договор со Заниоло.

Со новите сопственици „римската волчица“ доби стабилност, а Фридкин најави дека е подготвен да потроши поголема сума на пари во летниот преоден рок за да ја засили екипата, а исто така најави е изградба на нов стадион, но засега тој план не е приоритет.