Ролан Гарос: Вавринка ја запиша 150 грен слем победа!
Швајцарецот Станислас Вавринка се пласираше во третото коло на турнирот во Париз, „Ролан Гарос“. Шампионот од 2015 година денеска во втората рунда го совлада Германецот Доминик Кепфер со 6:3, 6:2, 3:6 и 6:1.
Вавринка до 150 триумф на грен слем турнирите дојде после два часа и 10 минути игра. На крајот имаше 51 „винер“ и 52 неизнудени грешки, додека неговиот ривал имаше 17 директни поени и 33 грешки.
Следен противник на швајцарскиот тенисер ќе биде Французинот Гастон кој беше подобар од Јапонецот Нишиока.
Во другите средби од денешната програма кои се досега завршени, Американецот Корда приреди изненадување елиминирајќи го сонародникот Џон Иснер со 3:1 (6:4, 6:4, 2:6, 6:4), а се радуваше уште еден американски претставник, Фриц триумфираше над Албот од Молдавија.
Во женска конкуренција својот настап рано го заврши Викторија Азаренка од Белорусија која двапати со 6:2 загуби од словачката претставничка Ана Каролина Шмидлова.
Надја Подороска од Аргентина ја изненади Јулија Путинцева од Казахстан (6:3, 1:6, 6:2), а Барбора Стрицова загуби во чешкиот дуел од Барбова Крејчикова со 4:6, 6:3 и 3:6.
Успешни беа уште Свитолина, Александрова, Анисимова, додека Кики Бертенс од Холандија, петтата носителка на турнирот со 7:6 (5), 3:6 и 9:7 триумфираше против Сара Ерани од Италија.