Родителите задоволни од бојкотот, но алармираат на притисоци од наставници

22 септември 2020, Скопје / Фото: Драган Митрески - Слободен печат

Родителите кои се против дигитализацијата во образованието и кои најавија целосен бојкот на наставата, информираат дека од денеска нивните ученици ја бојкотираат наставата, а во формираната Фејсбук група „Учебници и настава мора да има“ ги споделуваат досегашните искуства.

– Добивам информации кои пристигнуваат од родители и засега состојбата со бојкотот е позитивна – вели за „Слободен печат“ Драгана Спасевска, која вчера на прес пред МОН ги повика учениците и родителите на бојкот.

Сепак, како што вели Спасевска, но и од она што може да се прочита во групата, учениците се соочуваат со притисок од наставниците кои бараат од нив да се вклучат на настава, а во спротивно им се закануваат дека ќе добијат неоправдани изостаноци.

Фото: Твитер

– Има проблем само кај дел од политичките вработени просветни работници кои вршат притисок врз родителите и врз децата за да се вклучат на настава – објаснува Спасевска, додавајќи дека бојкотот ќе трае само во текот на денешниот ден.

И лидерот на средношколскиот Сојуз, Бленди Ходаи, кој иако вели оти се уште нема конечни податоци, потврди оти во некои училишта се случува бојкот.

– Конечна информација се уште немаме, но станува збор за истите училишта како и вчера – „Орце Николов“, „Никола Карев“, „Јосип Броз во Скопје, но и во медицинското средно училиште во Штип има бојкот на наставата – вели Ходаи за „Слободен печат“.

Видео на денот