Пејачот Роби Вилијамс е позитивен на коронавирусот и е во карантин на Карибите, откако со својата сопруга Ајда и нивните четири деца заминале на одмор во Сент Бартс.

Кон крајот на декември, Вилијамс со неговото семејство заминале на патување за новогодишниот период, но пејачот почнал да се чувствува лошо по пристигнувањето на Карибите.

„Роби е прилично болен. Тој е затворен во вилата каде што престојува со своето семејство. Што и не е најлошото место во светот за карантин, иако тој не може да оди на плажа. Тој ќе мора да остане во карантин 14 дена“, изјавил извор близок до пејачот за „Сан“.

Извори блиски до 46-годишниот пејач, велат дека откако почна пандемијата со коронавирусот тој еднаш веќе „испаничил“ дека е позитивен на коронавирусот и бил во изолација, одделен од семејството во Лос Анџелес.

Имено, пејачот ги почитувал сите здравствени протоколи и појавувањата во јавноста му биле сведени на минимум.

„Бев многу исплашен“, изјави Роби, во периодот кога стравуваше дека е позитивен на ковид-19.

Тогаш, неговата сопруга сподели емотивно видео од Роби како се враќа од самоизолација.

„Деца кој доаѓа? Кој е тој?“, ги прашала децата, а кога го виделе веднаш почнале да трчаат во неговите прегратки.