Ристовски: Не верувам дека можеме повторно да одиграме толку слабо
Репрезентативците сè уште во мислите го имаат катастрофалниот настап против Австрија во Скопје кога загубија со 1:4. Иако репрезентацијата е десеткувана поради повредите на одредени стандардни фудбалери (Аријан Адеми, Иван Тричковски) и суспензии (Илија Несторовски, Бобан Николов, Висар Муслиу), фудбалерите се надеваат дека ќе одиграат далеку подобро од првата средба.
– Ривалот има силен состав, но ние сме фокусирани да одиграме на вистинското ниво и овие квалификации да ги заокружиме на добар начин, како и што ги игравме досега. Ако сакаме Македонија да игра на Европско првенство, секој меч е најважен за нас. Секако дека имаме желба и мотиви да одиграме најдобро што можеме во моментот. Имаме проблеми, но верувам дека сите што ќе истрчаат ќе бидат на потребното ниво, со срце. И исто така мислам дека не можеме да бидеме така слаби како на првиот меч против Австрија – вели дефанзивецот Стефан Ристовски.
Дополнителен проблем за селекторот е тоа што најверојатно и капитенот Горан Пандев нема да може да настапи на утрешната средба (20.45 ч.). Селекторот Игор Ангеловски посакува една работа од своите избраници на утрешниот натпревар, со максимална ангажираност.
– Имаме кадровски проблеми, но рековме дека нема да се жалиме, така и ќе биде, ќе играат тие што се подготвени и јас верувам во нив. Можно е шанса да добијат и некои дебитанти, но ако им е прв меч не значи дека немаат квалитет. Сигурен сум дека утре сите фудбалери ќе го дадат максимумот и ќе одиграат најдобро што знаат. На овие мечеви сакаме да го потврдиме квалитетот и да се подготвиме за полуфиналето на Лигата на нации. Австрија беше доминантна во текот на квалификациите, тие се на прагот на пласман на Европско првенство, но ние си ја гледаме нашата работа – рече Ангеловски.