Вечера во 20.15 часот на германската телевизија ХР1 ќе биде емитувана репоратажа од Македонија која ја снимија режисерите Нина Хајнс и Јенс Бенер. Репортажата со наслов „Nordmazedonien – Kommt auf die Bucket List“ говори за убавините на земјата и необичните места кои авторите ги посетиле во текот на престојот во Македонија со препорака од насловот задолжително да се посети.

„Околу 80 проценти од пејзажот на Северна Македонија се карактеризира со високи планини и планински венци – идеална дестинација за патување за ентузијасти на отворено. Без разлика дали се работи за планинарење, за јавање коњи или за параглајдерството – режисерите Нина Хајнс и Јенс Бенер речиси ништо не оставија неискусено од недопрената природа на балканската земја. Малата балканска земја нема излез на море, но Охридското Езеро дава чувство на вистински одмор. Се смета за едно од најстарите езера во светот и тука Нина и Јенс го посетуваат најпознатиот манастир во земјата, Свети Наум“, стои во најавата за емисијата.

Во продолжение се зборува и за нивното воодушевување од Преспанското Езеро, за спомениците во Скопје, но и за ајварот, најпознатиот македонски деликатес.

„Преспанското Езеро во граничниот триаголник на Северна Македонија, Албанија и Грција е познато по многуте пеликани. Ќе одите на истражувачка тура со чувар од Националниот парк, каде што одблиску ќе им се восхитувате на кормораните и желките. Главниот град. Скопје доживеа бизарно преуредување во последниве години: безброј згради и статуи се обновени, но во стилот на минатите времиња – интересен архитектонски судир. И, се разбира, двајцата протагонисти гледаат во тенџерињата за готвење во земјата и учат како да подготвуват ајвар, познат и како „кавијар на Балканот“, пишува во најавата за репортажата посветена на Македонија.

Репортажата за Македонија која ќе се емитува пред германската телевизиска публика трае 45 минути.