Јужна Кореја констатира дефекти во две од четирите беспилотни летала RQ-4 Global Hawk што ги купи од САД, јави Јонхап, повикувајќи се изјава на владин службеник, кој побарал да не биде именуван. Пронајдено е истекување на масло во опремата за слетување на еден авион, а друг имал проблем со контролниот сензор, изјавил официјалниот претставник.

Според извор од одбраната, јужнокорејските воени власти се консултираат со американската одбранбена компанија „Нортроп Груман“, производител на напредни беспилотни летала со далечинско управување за надзор на голема надморска височина.

Јужна Кореја откри дефекти во два од четири дрона RQ-4 Block 30 Global Hawks купени за 847 милиони американски долари. Првиот пристигна во декември минатата година, а испораката на останатите заврши во септември оваа година.

Засега е непознато дали дефектот постоел за време на доставувањето или настанал за време на експлоатацијата.

Војската планира да ги распореди дроновите во втората половина на следната година, по подготвителните процедури, рече изворот.

– Веруваме дека ќе нема проблем да се стават во нормална работа до целниот период”, рече официјален претставник на воздухопловните сили, одбивајќи да наведе детали.