Грција го регистрираше својот прв случај на новиот сој на коронавирусот, омикрон, објави денеска министерот за здравство Танос Плеврис, пренесува Катимерини.

Инфекцијата е потврдена кај Грк кој живее во Јоханесбург и летал од Јужна Африка на Крит за празниците, рече Теоклис Заутис, шефот на Националната организација за јавно здравје (EODY), на заедничката прес-конференција со Плеврис, каде ги прецизираа новите мерки со кој се задолжува вакцинација за сите лица над 60 години.

Мажот, кој е целосно вакциниран, пристигнал на Крит на 26 ноември и направил брз антигенски тест на аеродромот кој бил негативен.

Вториот тест следниот ден, откако развил благи симптоми на ковид-19, повторно добил негативен резултат додека третиот на 29 ноември не ја потврди инфекцијата. Здравствените власти во четвртокот наутро потврдија дека станува збор за варијантата омикрон.

Заутис изјави дека мажот останува во карантин и дека неговите контакти биле негативни.