Хрватска и Словенија бележат рекордни бројки за заразени лица со ковид-19 на дневно ниво. Хрватскиот национален штаб за цивилна заштита соопшти дека во последните 24 часа во земјата се регистрирани 1.413 позитивни наоди, па бројот на активни случаи во земјата достигна 11.311. На болничко лекување се наоѓаат 897 пациенти од кои 57 се приклучени на респиратор.

Од 25 февруари оваа година кога беше евидентиран првиот случај на ковид-19 во Хрватска, досега се инфицирани вкупно 38.621 лице од кои 470 починаа, а 26.840 оздравеа од кои 1.003 во изминатото деноноќие. Во самоизолација се 27.720 лица.

Словенија, пак, за изминатите 24 часа пријави 1.499 позитивни лица,  а како последица на вирусот починаа пет пациенти. Словенечката влада објави дека бројот на дневно регистрирани пациенти е дуплиран за една недела.

Со најновите случаи, вкупниот број на заболени со ковид-19 во Словенија од почетокот на пандемијата изнесува 25.579 лица од кои 256 починаа. Националната двонеделна инциденца на 100.000 жители моментно е 780.

Во болниците во моментот се сместени 560 пациенти со ковид-19 од кои 86 на одделенијата за интензивна нега, потврди денеска словенечкото Министерство за здравство.