Шарл Мишел и Урсула фон дер Лајен попладнево ќе одржат видео средба со турскиот претседател, Реџеп Таип Ердоган во пресрет на самитот на ЕУ кој ќе се одржи идната недела, јави дописничката на МИА од Брисел.

Дипломатите во Брисел брифираат дека теми на разговор ќе бидат односите помеѓу ЕУ и Турција, поточно ситуацијата во источниот Медитеран, преговорите со Грција за решавање на кипарскиот спор и регионалните прашања, специфично ситуацијата во Либија.

Од Советот на ЕУ велат дека интензивирањето на соработката помеѓу ЕУ и Турција “ќе зависи од тоа дали Турција ќе одлучи да работи со ЕУ, да ги намали тензиите и да стави крај на иритацијата”.

-Областите се добро познати, од економијата и трговијата до човечките контактите и мобилноста како и соработката во областа на миграцијата и засилувањето на дијалогот за низа секторски политики, велат ЕУ дипломатите во Брисел во пресрет на средбата.

Претседателот на Европскиот Совет и претседателката на Европската Комисија во еден часот попладнево ќе разговараат со Ердоган.