Откако Рено го комплетира тандемот возачи за наредната сезона со враќањето на Фернандо Алонсо, се помал избор останува за Себастијан Фетел кој по крајот на сезоната си заминува од Ферари.

Во последните изјави на Фетел многумина добија впечаток дека тој се нуди на Ред Бул со кого освои четири шампионски титули, но од австрискиот тим одлучија да стават крај на ваквите шпекулациите.

– Оваа тема е се поактуелна. Имавме одличен период со Фетел кога возеше за нас и тој засекогаш ќе биде дел од нашата историја. Не очекувавме дека тој ќе биде на пазарот како слободен агент, но ние сме посветени на возачите кои ги имаме и сметаме дека имаме одличен пар во Макс Ферстапен и Александер Албон. Сметаме дека и двајцата имаат огромен потенцијал. Се плашам дека ова е дефинитивно не, и Себастијан е свесен за тоа – изјави првиот човек на Ред Бул, Кристијан Хорнер.

Хорнер смета дека е сосема реално Фетел во наредната сезона да вози за Астон Мартин.
– Необично е четирикратен светски шампион да биде без тим и претпоставувам дека има неколку избори пред себе и можеби Рејсинг Поинт е еден од нив – додава Хорнер.

Токму екипата на Рејсинг Поинт од наредната сезона ќе се преименува во Астон Мартин, а сезонава за тимот возат Серхио Перез кој има договор и за наредната сезона но има и силна финансиска поддршка од најголемите мексикански компании, а втор возач е Ленс Строл, синот на газдата на екипата.