Европскиот комесар за економија Паоло Џентилони во интервју за германски Велт вели дека како последица на корона вирусот рецесијата во земјите станува се подлабока, а тоа пак според него може да доведе до распад на Еврозоната.

– Последните економски податоци предупредуваат: рецесијата е подлабока отколку што се очекуваше, економскиот развој на државите во еврозоната станува понерамномерен, отколку што беше прогнозирано претходно. Тоа на што секогаш предупредувавме се случува: рецесијата поради ковид-19 се заканува да ја распадне еврозоната“, истакна еврокомесарот.

Според него, државите на ЕУ треба во најкраток можен рок да договорат план за обнова на економијата за јакнење на довербата во националните економии.

Претходно Европската комисија претстави план за основање фонд за спасување на ЕУ во висина од 750 милијарди евра. Овој предлог Европската комисија ќе им го поднесе на државите членки и на Европскиот парламент, кои можат да го изменат.