Рецепт за Павлова венец, гастрономско уживање од Дијана Иваноска
Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.
„Го сакам секој дел од процесот, но најмногу уживам во фотографирањето на храната“, ни открива Дијана.
Инвентивната Дијана денеска споделува рецепт за едно гастрономско уживање – Павлова венец.
„Крцкава однадвор, а мека и сочна во внатрешноста. Комбинирана со слатка павлака и овошје, превкусна“, порачува Дијана.
Состојки:
– 5 белки (на собна температура)
– 250 грама шеќер
– 1 лажиче сок од лимон
– 1 лажиче ванила екстракт
– 2 лажичиња скроб
– 200 мл слатка павлака (изматена)
– Овошје по желба
Подготовка:
Белките матете ги додека добиете меки врвови. Постепено додавајте го шеќерот додека матите. Кога ќе добиете цврст снег додајте го сокот од лимон, ванилата и скробот и матете уште кратко.
Нанесете ја смесата на тава обложена со хартија за печење. Претходно нацртајте го обликот на хартијата за печење и превртете ја хартијата. Оформете ја убаво со лажица и направете мали вдлабнатини на површината.
Печете 1 час и половина на температура од 120 степени Целзиусови. Исклучете ја рерната и оставете ја внатре додека се излади целосно.
Пред послужување, додајте изматена слатка павлака и овошје по желба.
Уживајте!