Ребаланс на Буџетот на Општина Карпош: Повеќе пари за социјална помош, за инфраструктура и за улично осветлување
Советниците на Советот на Општина Карпош, денеска ги усоија измените и дополнување на Буџетот за 2022 година, кој се зголеми за 115.133.000 денари. Така, во изменетиот Буџет е предвидено зголемување зголемување на износот за социјални надоместоци за 2 500 000 денари, поради зголемениот број барања од граѓаните за социјална помош. Во програмата за уредување на градежно земјиште, извршено е зголемување од 9.300.000 на 11.300.000 денари, поточно на ставката за реконструкција на станбени објекти, а предвидени се и зголемени износи во ставката за капиталните трошоци, каде е извршено зголемување од 20.700.000 денари на 32.300.000 денари, заради потребата за изградба на инфраструктурни објекти за фекална и атмосферска канализација.
За одржување на јавното осветлување, како и за исплата на зголемените сметки за електрична енергија за улично осветлување, износот од 48.000.000 денари се зголемува на 67.000.000 денари. За одржување и заштита на локалните патишта на територија на општина Карпош, досега предвидената финансиска рамка од 14.000.000 денари се зголемува на 20.500.000 денари – информираат од Карпош.
Повеќе пари во Буџетот се предвидени и за одржување и користење на паркови и зелени површини, за образование и за културни манифестации.
За изградба и реконструкција на локални патишта и улици, износот од 46.819.000 денари се зголемува на 62.819.000 денари, од причина што се потребни повеќе средства за исплата на судски решенија, како и за изградба и реконструкција на патната инфраструктура во Карпош – соопштуваат од општината за изменетите ставки во Буџетот за 2022.