Реал Мадрид не се откажува од Килијан Мбапе и наредното лето ќе тргне со сите сили во реализација на трансферот, пишува „АС“.

Според весникот кој се смета за близок до Реал Мадрид и ретко греши во информациите кога станува збор за „кралевите“, тврди дека најдобрата шанса за претседателот Флорентино Перез да ја исполни големата желба е идното лето бидејќи договорот на Мбапе истекува во 2022 година.

Одличниот француски репрезентативец веќе ги извести челниците на ПСЖ дека нема намера да потпише нов договор, дека сака да си замине од „Паркот на принцевите“ и дека сака тоа се случи наредното лето.

Поради ваквиот став на Мбапе, „АС“ смета дека токму идното лето е иделна можност ПСЖ да заработи на трансферот на Мбапе бидејќи Перез е подготвен да понуди околу 170 милиони евра како обесштетување.

Од друга страна, спортскиот директор на ПСЖ, Леонардо, изјави дека клубот работи на продолжување на договорите со четворица фудбалери, Мбапе, Нејмар, Анхел ди Марија и Јулијан Дракслер, но и француските медиуми не веруваат дека Мбапе ќе се согласи да потпише нов договор бидејќи сака да игра за Реал Мадрид и да работи под палката на Зинедин Зидан.