Баерн Минхен од лето ќе сврти нова страница, на клупата ќе седне суперталентираниот 33-годишен тренер Јулијан Нагелсман кој ќе има одврзани раце да направи реконструкција на тимот.
Главна цел на Нагелсман ќе биде подмладување на екипата, а тоа може да биде сигнал за заминување на Роберт Левандовски.
И самиот фудбалер најави дека сака нов предизвик во кариерата, негов сон е да го облече дресот на Реал Мадрид, но ЕСПН пренесува дека сериозен интерес за полскиот репрезентативец доаѓа од Премиер лигата. Челси и Манчестер сити се заинтересирани за еден од најдобрите напаѓачи на денешницата.

Манчестер сити на крајот од сезоната ќе се раздели со Серхио Агуеро, а иако главна цел им е Ерлинг Халанд, менаџерот Пеп Гвардиола нема ништо против на „Етихад“ да пристигне Полјакот. Левандовски е далеку поевтина варијанта, неговиот трансфер би чинел околу 60 милиони евра, а Гвардиола би добил играч со кого работеше и многу добро ги знае неговите квалитети.

Од друга страна, Челси нема класичен напаѓач во својот тим, Тимо Вернер се покажа како тотално промашување додека Тами Абрахам на лето си оди од тимот. Менаџерот на Челси, Томас Туухел не би имал ништо против во својот тим да го види Левандовски, а оваа идеја му се допаѓа и на сопственикот Роман Абрамович.