Фудбалерите на Реал Мадрид во градското дерби со 2:1 го совладаа Атлетико Мадрид и го задржаа перфектниот учинок во новата сезона во Ла Лига.

Реал Мадрид по шест кола во Ла Лига има перфектни шест победи и се врати на првото место на табелата, додека Атлетико Мадрид е седми на табелата со осум бода помалку од градскиот ривал.

Иако фудбалерите на Атлетико Мадрид подобро го започнаа натпреварот и доминираа на „Ванда Метрополитано“, првото полувреме заврши со предност на актуелниот европски и шпански шампион. Резултатот го отвори Родриго во 18 минута по одличната асистенција на Чуамени, а на 0:2 зголеми Федерико Валверде.

Во второто полувреме, тренерот на Атлетико, Диего Симеоне се обиде со измени да го пробие бункерот на Реал, прво влегоа Мората и Куња, па Кореа, но домаќините беа прилично безопасни пред голот на Куртоа.

Единствено што успеаја да направат домашните фудбалери беше да го намалат резултатот во 83. минута со голот на Хермосо.