Премиерот Зоран Заев вечерва гостуваше во Дневникот на ТВ Сител по што следуваше реакција во вид на соопштение на ВМРО-ДПМНЕ во кое лидерот на СДСМ е опишан како „очаен, осамен и арогантен олигарх кој од петни жили се држи за фотелјата, користејќи брутални лаги“.

– Штом зине, веднаш ќе излаже. Наспроти розевите очила и неговите лаги реалноста изгледа вака: Македонија е петта во свет по смртност од ковид-19 според „Франс прес“. Македонија со Заев е хибриден режим што е потврдено од „Фридом хаус“ и трета најсиромашна држава на европскиот континент, според ЕУРОСТАТ. Македонија е најнесреќна земја во светот потврдено од агенцијата „Галуп“, се наведува во дописот на опозициската партија.

Заев, според ВМРО-ДПМНЕ, се расрфла со бројки и, како што стои во соопштението, „призна дека ја лажел јавноста кога велеше дека во преговори со Полска и со Австрија ќе обезбеди вакцини против корона. И сега наместо општа вакцинација ќе се вакцинира бројка колку што има жители во едно Злетово.

– Потоа Заев призна дека директен проблем во разговорите со Бугарија не е само јазикот туку комплетните идентитетски обележја на народот и Македонија. Заев призна дека преговара за идентитетот. Оттука е нејасно зошто Заев сè уште преговара кога на маса е идентитетот. Заев е осамен во неговата намера за реформи на наставните програми, откажувајќи се од предметот историја што е анационален потег кој го осудија сите релевантни општествени субјекти, обвинува опозицијата.

Заев: Попис мора да има, предвремени избори ќе нема за да не и земаме време на државата

Што се однесува за пописот, се прашуваат од ВМРО-ДПМНЕ, каков е тој инклузивен попис за кој говори Заев во кој власта не прифати ниту еден амандман на опозицијата.

– Илузорно е да се верува дека една Германија, Шкотска и Ирска кои го одложија пописот поради корона-кризата, се помалку спремни од најнеспособната влада на Зоран Заев. Тоа јасно говори дека Заев е подготвен за нов фалсификат кој нема да биде признаен од ВМРО-ДПМНЕ, јасно посочувајќи дека доколку Заев еднострано продолжи да го турка овој фалсификат, се што е во надлежност и на располагање на ВМРО-ДПМНЕ ќе направи да го девалвира овој политички попис, најавуваат од опозициската партија.

Што се однесува до анкетите, ВМРО-ДПМНЕ истакнува дека „Заев може минимално да води само на анкети за кои плаќа 33 милиони евра како што беше последно објавената.