Младиот играч од средниот ред има договор со Барселона до 2022 година, но преговорите околу негово продолжување не успеаја.

Еден од најталентираните играчи на Барса, 18-годишниот Илајш Мориба е незадоволен на „Камп Ноу“ и сака да го напушти клубот.

Во шпанските медиуми се појави информација дека поради тешката финансиска ситуација во клубот нема да дојде до нов договор. Остануваат само две опции, трансфер на 18-годишниот фудбалер или заминување следното лето без отштета.

Барселона им кажа на заинтересираните клубови дека нема да го продадат Мориба за помалку од 15 милиони евра и веќе одби осум милиони евра од Лајпциг.

Тренерот на каталонската екипа, Роналд Куман, исто така, зборуваше за целата ситуација на прес-конференција во пресрет на саботното гостување во Билбао кај Атлетик.

– Зборував со Мориба пред две или три недели, и тоа повеќе како човек отколку како тренер на Барселона. Според мое мислење, неговата ситуација е ужасна. Има 18 години, млад е, му беше дадена можност да игра во првиот тим и тој е иднината на овој клуб, но одлучи дека не сака да игра во Барселона. Знам што може и сака да му понуди клубот и би го советувал дека парите не се најважната работа. Јас сум разочаран. Парите не се и не треба да бидат најважното нешто во животот на 18-годишник – рече Куман.