Oткако севернокорејскиот преговарач објави дека се прекинати нуклеарните преговори на работно ниво меѓу Северна Кореја и САД во Стокхолм, Стејт департментот соопшти дека двете делегации имале „добри разговори”.

Портпаролот на Стејт департментот, Морган Ортагус, во соопштение наведе дека претходните коментари на делегацијата на Северна Кореја „не биле одраз на содржината или духот на разговорите кои траеле осум и пол часа”.

САД излегоа со „креативни идеи” и имаа „добри разговори” со своите колеги од Северна Кореја, се додава во соопштението.

Стејт департментот наведува дека на крајот од разговорите, САД предложиле да се прифати поканата на шведскиот домаќин за одржување нова средба во Стокхолм за две недели, со цел да продолжат дискусиите за сите теми.

САД, како што се истакнува, ја прифатиле поканата.

Главниот преговарач на Северна Кореја Ким Мјонг Гил претходно изјави дека вчерашните нуклеарни преговори на работно ниво меѓу Северна Кореја и САД се прекинати.