Раскази кои ја истражуваат душата на грчкиот народ во услови на економска криза
Меѓу книгите кои во 2021 година беа објавени од издавачката куќа „Или-Или“ е збирката раскази „Нешто ќе се случи, ќе видиш“ од Христос Иконому, како прв превод од грчки на македонски јазик во популарната едиција „ПРОаЗА“. Преводот на расказите е на Петар Андоновски, дизајнот на корицата на Марија Смилевска, а книгата е дел од проектот „Креативна Европа“ на Европската унија.
– Оваа потресна збирка раскази мајсторски ја истражува душата на грчкиот народ во услови на економска криза. Приказните се уникатни и сурови и навлегуваат длабоко во емотивниот пејзаж на невработеноста, гладот и очајот, но вклучуваат фрагменти од мрачен хумор и обиди за зачувување на достоинството. Од отпуштен работник кој не може да обезбеди храна за својот син до жена чие момче ѝ го краде јајцето од гнездото, преку група болни старци кои чекаат отворање на клиника, ние сме свесни за најдлабоките мисли и секојдневните постапки на обичните луѓе кои се справуваат со тешки околности, кои се надвор од нивна контрола. Брилијантните слики и проникливото пишување на Иконому се едноставно убави за читање и размислување – е краткиот опис на книгата.
Христос Иконому е роден во Атина во 1970 година. Има објавено четири збирки раскази: „Жената на шините“ (2003), „Нешто ќе се случи, ќе видиш“ (2010), „Добрата волја ќе дојде од морето“ (2014) и „Ќерките на вулканот“ (2017). „Нешто ќе се случи, ќе видиш“ ја освои престижната грчка државна награда за најдобра збирка раскази и постигна голем интернационален успех, известија од „Или-Или“.